Ўзбекистон Республикаси Олий Мажлиси Қонунчилик палатасининг сайловдан кейинги биринчи мажлиси якунланди. Унда қуйидаги қўмиталарга раислар сайланди:

▪️Бюджет ва иқтисодий ислоҳотлар қўмитаси — Шарафиддин Назаров

▪️Меҳнат ва ижтимоий масалалар қўмитаси — Мавлюда Ходжаева

▪️Мудофаа ва хавфсизлик масалалари қўмитаси — Эркин Салихов

▪️Халқаро ишлар ва парламентлараро алоқалар қўмитаси — Дилором Файзиева

▪️Саноат, қурилиш ва савдо масалалари қўмитаси — Мурод Қобилов

▪️Аграр ва сув хўжалиги масалалари қўмитаси — Равшан Мамутов

▪️Фан, таълим, маданият ва спорт масалалари қўмитаси — Эркин Захидов

▪️Демократик институтлар, нодавлат ташкилотлар ва фуқароларнинг ўзини ўзи бошқариш органлари қўмитаси — Шухрат Вафаев

▪️Инновацион ривожланиш, ахборот сиёсати ва ахборот технологиялари масалалари қўмитаси — Илхом Абдуллаев

▪️Коррупцияга қарши курашиш ва суд-ҳуқуқ масалалари қўмитаси — Жаҳонгир Ширинов

▪️Фуқароларнинг соғлиғини сақлаш масалалари қўмитаси — Елена Борисова

▪️Экология ва атроф муҳитни муҳофаза қилиш масалалари қўмитаси — Борий Алихонов

Сайлов якунлари бўйича олинган депутатлик ўринларини инобатга олган ҳолда қўмиталар Қонунчилик палатаси фракциялари ўртасида қуйидагича бўлинди:

Тадбиркорлар ва ишбилармонлар ҳаракати – Ўзбекистон Либерал-Демократик партиясининг фракцияси — 7 та

•  Мудофаа ва хавфсизлик масалалари қўмитаси

•  Меҳнат ва ижтимоий масалалар қўмитаси

•  Аграр ва сув хўжалиги масалалари қўмитаси

•  Саноат, қурилиш ва савдо масалалари қўмитаси

•  Фан, таълим, маданият ва спорт масалалари қўмитаси

•  Халқаро ишлар ва парламетлараро алоқалар қўмитаси

•  Демократик институтлар, нодавлат ташкилотлар ва фуқароларнинг ўзини ўзи бошқариш органлари қўмитаси

Ўзбекистон «Миллий тикланиш» демократик партиясининг фракцияси — 2 та

•  Коррупцияга қарши курашиш ва суд-ҳуқуқ масалалари қўмитаси

•  Инновацион ривожланиш, ахборот сиёсати ва ахборот технологиялари масалалари қўмитаси

Ўзбекистон Халқ демократик партиясининг фракцияси — 1 та

•  Бюджет ва иқтисодий ислоҳотлар қўмитаси

Ўзбекистон «Адолат» социал-демократик партиясининг фракцияси — 1 та

•  Фуқароларнинг соғлиғини сақлаш масалалари қўмитаси

Ўзбекистон экологик партиясининг фракцияси — 1 та

•  Экология ва атроф муҳитни муҳофаза қилиш масалалари қўмитаси

Маълумот учун: Қонун лойиҳаларини тайёрлаш ишини олиб бориш, Қонунчилик палатаси муҳокамасига киритиладиган масалаларни дастлабки тарзда кўриб чиқиш ва тайёрлаш, Ўзбекистон Республикаси қонунлари ҳамда палата томонидан қабул қилинадиган қарорларнинг ижросини назорат қилиш учун Қонунчилик палатасининг ваколатлари муддатига Қонунчилик палатаси депутатлари орасидан раис, унинг ўринбосари ва аъзолардан иборат таркибда қўмиталар сайланади.

Қўмита раиси, унинг ўринбосари ва қўмита аъзолари лавозимлари депутатларнинг қайси партия ёки гуруҳга мансублигини ҳамда сайловда сайловчиларнинг қанча овозини олганлигини инобатга олган ҳолда яхлит (умумий) қарор билан белгиланади.

Қонунчилик палатаси қўмиталарининг барча аъзолари тенг ҳуқуқлардан фойдаланадилар. Қўмита таркибига сайланмаган депутат унинг ишида маслаҳат овози ҳуқуқи билан иштирок этишга ҳақли.

Қонунчилик палатаси қўмиталари Қонунчилик палатаси олдида масъул ва унга ҳисобдордир.

Қонунчилик палатаси қўмиталари:

ўз ташаббуси билан ёки Қонунчилик палатасининг топшириғига биноан Ўзбекистон Республикаси қонунларининг ҳамда ўзининг ваколатларига кирадиган масалалар юзасидан Қонунчилик палатаси бошқа қарорларининг лойиҳаларини ишлаб чиқади;

қонун лойиҳаларининг дастлабки тарзда кўриб чиқилишини ва уларни Қонунчилик палатасида кўриб чиқишга тайёрлашни амалга оширади;

қонунларнинг лойиҳалари юзасидан хулосалар беради, қонун лойиҳасини Қонунчилик палатасининг мажлиси кун тартибига киритиш, унинг устида ишлашни давом эттириш ёки асослантирилган ҳолда уни рад этиш тўғрисида Кенгашга таклифлар киритади;

Ўзбекистон Республикасининг Давлат бюджети лойиҳаси юзасидан хулосалар ва таклифлар беради;

Қонунчилик палатасининг топшириғига ёки палата Кенгашининг тавсиясига биноан муайян қонун лойиҳаси ёки палата ваколатларига кирадиган бошқа масала юзасидан масъул бўлади;

киритилган қонун лойиҳаларини кўриб чиқиш бўйича ишчи гуруҳлари тузади, уларнинг таркибига давлат органлари ва нодавлат нотижорат ташкилотларининг, илмий муассасаларнинг вакилларини, мутахассислар ва олимларни, хўжалик юритувчи субъектларнинг раҳбарларини жалб этади;

қонунчилик ташаббуси ҳуқуқи субъектлари вакилларининг улар томонидан киритилган қонун лойиҳасига тааллуқли масалалар юзасидан фикрларини эшитади;

киритилган Ўзбекистон Республикаси қонунлари, шунингдек Қонунчилик палатаси томонидан қабул қилинаётган қарорлар матнига ўзгартиш ёки қўшимчалар киритиш юзасидан таклифлар тайёрлайди;

давлат органлари ва бошқа ташкилотлардан, мансабдор шахслардан ҳужжатларни, эксперт хулосалари, статистика маълумотлари ва бошқа маълумотларни талаб қилиб олади;

давлат ҳокимияти ва бошқаруви органлари раҳбарларининг Ўзбекистон Республикаси қонунлари, бошқа қонун ҳужжатлари ҳамда қўмиталарнинг қарорлари улар томонидан қандай бажарилаётгани ҳақидаги ахборотларини эшитади.

Қонунчилик палатаси қўмиталари ишни ўз режаларига, шунингдек Қонунчилик палатаси, унинг Спикери ва Кенгаши топшириқлари ҳамда тавсияларига мувофиқ ташкил этади.

Қонунчилик палатаси қўмиталарининг фаолияти тартиби Қонунчилик палатаси Регламентида белгиланади.

Қонунчилик палатаси қўмиталарининг мажлислари палата мажлислари оралиғида заруратга қараб ўтказилади.

Қонунчилик палатаси қўмиталарининг мажлислари, агар уларда қўмита аъзоларининг камида ярми ҳозир бўлса, ваколатли ҳисобланади.

Қонунчилик палатаси қўмиталарининг мажлислари очиқ ўтказилади. Зарурат бўлганида Қонунчилик палатаси қўмиталари ёпиқ мажлис ўтказиш тўғрисида қарор қабул қилиши мумкин.

Қўмиталарнинг мажлисларига давлат органлари ва нодавлат нотижорат ташкилотларининг, илмий муассасаларнинг вакиллари, мутахассислар ва олимлар, матбуот органларининг, телевидение, радио ҳамда бошқа оммавий ахборот воситаларининг вакиллари таклиф қилиниши мумкин.

Қонунчилик палатаси қўмиталари кўриб чиқилаётган масалалар юзасидан қўмита жами аъзоларининг кўпчилик овози билан қарорлар қабул қилади.

Қонунчилик палатаси қўмиталарининг давлат органларига юборилаётган қарорлари улар томонидан кўриб чиқилиши шарт, натижалари ёки кўрилган чоралар тўрисида, агар қарорда бошқача қоида белгиланган бўлмаса, узоғи билан бир ойдан кечиктирмай хабар қилиниши керак.