Тадбирда элчихона, Ташқи меҳнат миграцияси агентлигининг Кванжу шаҳридаги ваколатхонаси ҳузурида ташкил этилган сайлов комиссияси аъзолари ҳамда бу ерда доимий ва вақтинча истиқомат қилаётган фаол ватандошлар ҳозир бўлди.

Давра суҳбатида мамлакатимизда ушбу муҳим сиёсий жараённи ташкил этиш бўйича кўрилаётган тайёргарлик ишлари, элчихона ҳузурида ташкил этилган сайлов участкаларида фуқароларимизнинг овоз бериши учун яратилаётган шарт-шароитлар, муддатидан олдин овоз бериш тартибининг ташкилий жиҳатлари, шунингдек, Ўзбекистон Президенти сайлови кампанияси, давлат раҳбарлигига номзодлар ва уларнинг сайловолди дастурлари, миллий қонунчиликдаги ўзгаришлар ҳақида батафсил маълумотлар тақдим этилди.

18-сайлов участкаси вакиллари томонидан Ўзбекистон Конституцияси, Сайлов кодекси, янги чоп этилган ўқув қўлланмалари, сайловга оид қонун ҳужжатлари тўплами сайлов участкасида мавжудлиги таъкидлангани баробарида барча намунадаги баннер, стенд ва пешлавҳалар ҳамда Президентликка номзодларнинг сайловолди дастурлари муддатидан олдин овоз бериш учун мўлжалланган жойларга тарқатилиши маълум қилинди.

Мулоқот чоғида, шунингдек, Жанубий Кореядаги бугунги эпидемиологик вазиятдан келиб чиққан ҳолда, Ўзбекистон Президенти сайловини ўтказишда коронавирус инфекциясининг тарқалиши хавфини олдини олиш бўйича ижтимоий масофани сақлаш, сайловга келувчиларнинг ниқоб тақишини назорат қилиш, сайлов участкасини шахсий ҳимоя ва дезинфекция воситалари билан таъминлаш билан боғлиқ масалаларга ҳам алоҳида эътибор қаратилди.

Маълумотнома ўрнида: Корея Республикасида Ўзбекистон Президенти сайловини ўтказиш учун 17-сонли Сеул ҳамда 18-сонли Квангжу сайлов участкалари ташкил этилган. Бундан ташқари, аҳолига қулайлик яратиш, уларнинг ўз конституциявий ҳуқуқидан тўла фойдаланишини таъминлаш мақсадида Жанубий Кореянинг яна 14 та йирик шаҳарида муддатидан олдин овоз бериш нуқталари ташкил этилади.