O‘zbekiston Respublikasi

Markaziy saylov komissiyasining qarori

 № 1137                                                      2021-yil 30-sentabr

O‘zbekiston Respublikasi Prezidenti saylovini o‘tkazishda mamlakat aholisining sanitariya-epidemiologik osoyishtaligini ta’minlash va sog‘lig‘ini saqlash bo‘yicha qo‘shimcha chora-tadbirlar to‘g‘risida

COVID-19 pandemiyasi sharoitida O‘zbekiston Respublikasi Prezidenti saylovini o‘tkazishda mamlakat aholisining sanitariya-epidemiologik osoyishtaligini samarali tashkil etish va sog‘lig‘ini muhofaza qilish chora-tadbirlarini amalga oshirish maqsadida O‘zbekiston Respublikasi Saylov kodeksining 14 va 16-moddalariga muvofiq O‘zbekiston Respublikasi Markaziy saylov komissiyasi qaror qiladi:

1. COVID-19 pandemiyasi sharoitida O‘zbekiston Respublikasi Prezidenti saylovida mamlakat aholisining sanitariya-epidemiologik osoyishtaligi va sog‘lig‘ini muhofaza qilishni tashkil etish to‘g‘risida Respublika Sanitariya-epidemiologik osoyishtalik va jamoat salomatligi xizmati rahbarining o‘rinbosari B.J.Qurbonovning axboroti ma’lumot uchun qabul qilinsin.

2. O‘zbekiston Respublikasi Sog‘liqni saqlash vazirligi va Sanitariya-epidemiologik osoyishtalik va jamoat salomatligi xizmati:

saylov okruglari hududida epidemiologik vaziyatning kunlik tahlili olib borilishi va zaruratga ko‘ra saylov komissiyalariga tegishli tavsiyalar berilishini;

saylovni o‘tkazish davrida okrug va uchastka saylov komissiyalari joylashgan bino va xonalarni o‘z vaqtida dezinfeksiya qilish, shuningdek, ularda epidemiyaga qarshi chora-tadbirlar o‘tkazilishini ta’minlasin;

COVID-19 pandemiyasi sharoitida O‘zbekiston Respublikasi Prezidenti saylovini o‘tkazishda mamlakat aholisining sog‘lig‘ini muhofaza qilish va sanitariya-epidemiologik osoyishtaligini ta’minlash bo‘yicha okrug va uchastka saylov komissiyalari faoliyatini tashkil etishda ko‘maklashsin.

3. Okrug va uchastka saylov komissiyalari:

o‘zlari joylashgan binolarning kirish qismida va ovoz berish xonasida ijtimoiy masofani saqlash uchun 1,5–2 metr oraliq masofani belgilovchi hamda harakatlanish yo‘nalishini ko‘rsatuvchi chiziqlar bo‘lishini;

ovoz berish binosining kirish qismida koronavirus infeksiyasi tarqalishini oldini olish bo‘yicha tavsiyalar aks etgan plakatlar joylashtirilishini;

O‘zbekiston Respublikasi Markaziy saylov komissiyasining 2021 yil 25 avgustdagi 1104-son qarori bilan tasdiqlangan O‘zbekiston Respublikasi Prezidenti saylovini o‘tkazishda koronavirus infeksiyasi (COVID-19) tarqalishini oldini olish bo‘yicha yo‘riqnomaga qat’iy rioya etilishini ta’minlasin.

4. Mazkur qaror O‘zbekiston Respublikasi Sog‘liqni saqlash vazirligi va Sanitariya-epidemiologik osoyishtalik va jamoat salomatligi xizmatiga hamda okrug saylov komissiyalariga yetkazilsin, shuningdek O‘zbekiston Respublikasi Markaziy saylov komissiyasining rasmiy veb saytida e’lon qilinsin.

5. Mazkur qarorning ijrosini nazorat qilish O‘zbekiston Respublikasi Markaziy saylov komissiyasi raisining o‘rinbosari B. Kuchkarov zimmasiga yuklansin.

Rais                                                                               Z.Nizamxodjayev