O‘zbekiston Respublikasi

Markaziy saylov komissiyasining qarori

№1265                          2023-yil 24-may

O‘zbekiston Respublikasining chet davlatlardagi diplomatik va boshqa vakolatxonalari huzurida saylov uchastkalarini tuzish to‘g‘risida

O‘zbekiston Respublikasi Saylov kodeksining 10, 14 va 16-moddalariga asosan hamda O‘zbekiston Respublikasi Tashqi ishlar vazirligining O‘zbekiston Respublikasining chet davlatlardagi diplomatik va boshqa vakolatxonalari huzurida O‘zbekiston Respublikasi Prezidenti saylovini o‘tkazuvchi saylov uchastkalarini tuzish haqidagi taqdimnomasiga binoan O‘zbekiston Respublikasi Markaziy saylov komissiyasi qaror qiladi:

1. O‘zbekiston Respublikasining chet davlatlardagi diplomatik va boshqa vakolatxonalari huzurida O‘zbekiston Respublikasi Prezidenti saylovini o‘tkazuvchi 56 ta saylov uchastkalari ilovaga muvofiq tuzilsin.

2. O‘zbekiston Respublikasining chet davlatlardagi diplomatik va boshqa vakolatxonalari huzuridagi saylov uchastkalari O‘zbekiston Respublikasi Prezidenti saylovini o‘tkazuvchi 14-Toshkent shahar saylov okrugiga biriktirilsin.

3. O‘zbekiston Respublikasi Tashqi ishlar vazirligi:

O‘zbekiston Respublikasining chet davlatlardagi diplomatik va boshqa vakolatxonalari huzurida tuziladigan uchastka saylov komissiyalarining faoliyati uchun zarur shart-sharoitlar yaratilishini taʼminlasin;

chet davlatlarda turgan O‘zbekiston Respublikasi fuqarolarini xorijdagi saylov uchastkalari to‘g‘risida, saylovchilarni xorijdagi saylov uchastkasi saylovchilar ro‘yxatiga kiritish tartibi va muddatlari to‘g‘risida, muddatidan oldin ovoz berish kunlari va saylov kuni to‘g‘risida ommaviy axborot vositalari orqali yoki boshqa yo‘llar bilan (mahalliy sharoitni inobatga olgan holda) xabardor qilsin;

O‘zbekiston Respublikasining chet davlatlardagi diplomatik va boshqa vakolatxonalari huzurida tuzilgan saylov uchastkalaridagi jarayonlar haqida muntazam ravishda ommaviy axborot vositalarida yoritib borilishini taʼminlasin.

4. O‘zbekiston Respublikasi Transport vazirligi “Uzbekistan Airways” aksiyadorlik jamiyati bilan birgalikda O‘zbekiston Respublikasining chet davlatlardagi diplomatik va boshqa vakolatxonalariga muddatidan ilgari O‘zbekiston Respublikasi Prezidenti sayloviga doir hujjatlar va jihozlarning o‘z vaqtida yetkazib berilishini, shuningdek ushbu hujjatlar 14-Toshkent shahar okrug saylov komissiyasiga olib kelinishini taʼminlasin.

5. O‘zbekiston Respublikasi Markaziy saylov komissiyasi Kotibiyati zimmasiga O‘zbekiston Respublikasi Tashqi ishlar vazirligining so‘roviga binoan O‘zbekiston Respublikasining chet davlatlardagi diplomatik va boshqa vakolatxonalari huzurida tuzilgan saylov uchastkalarini muddatidan ilgari O‘zbekiston Respublikasi Prezidenti sayloviga oid hujjatlar, adabiyotlar va jihozlar bilan taʼminlash vazifasi yuklatilsin.

6. Mazkur qaror matni O‘zbekiston Respublikasi Markaziy saylov komissiyasining rasmiy veb-saytida eʼlon qilinsin.

7. Mazkur qaror ijrosini nazorat qilish O‘zbekiston Respublikasi Markaziy saylov komissiyasi raisining o‘rinbosari B. Kuchkarov zimmasiga yuklansin.

Rais                                                                           Z. Nizamxodjayev

ILOVA