2019-yil 5-iyul kuni Oʻzbekiston Respublikasi Markaziy saylov komissiyasi raisi M.Abdusalomov bilan Birlashgan Millatlar Tashkiloti Taraqqiyot dasturining (BMTTD) Oʻzbekistondagi Doimiy vakili Matilda Dimovska oʻrtasida uchrashuv boʻlib oʻtdi.

Mamlakatimizda davlat qurilishining demokratik asoslarini jadal rivojlantirish borasida olib borilayotgan siyosat doirasida Oʻzbekiston Respublikasining Saylov kodeksi hamda saylov jarayoniga axborot-kommunikatsion texnologiyalarni joriy etishga qaratilgan bir qator normativ-huquqiy hujjatlar qabul qilindi.

M.Dimovskaning taʼkidlashicha, Oʻzbekistonda saylov qonunchiligini xalqaro standartlarga muvofiqlashtirish borasida olib borilayotgan islohotlar xalqaro hamjamiyatning diqqat markazida boʻlib, bu boradagi oʻzaro hamkorlikni rivojlantirish qoʻllab-quvvatlanishini bildirdi.

Qayd etilganlarni inobatga olgan holda saylov organlari vakillarining malakasi, shuningdek, saylovchilarning huquqiy madaniyati va elektoral faolligini oshirish hamda saylov qonunchiligi va amaliyotini takomillashtirish muhokamalar mavzusida boʻldi.

Uchrashuvda tomonlar saylov sohasidagi hamkorlikni yanada rivojlantirish boʻyicha qoʻshma tadbirlarni amalga oshirish muhimligini tasdiqlab oʻtdilar.

Markaziy saylov komissiyasi
Matbuot xizmati