20 октябрь куни Марказий сайлов комисияси Раиси Зайниддин Низамходжаевнинг Туркия Олий сайлов кенгаши раиси  Мухаррем Аккая ва Олий сайлов кенгаши аъзоси Куршат Хамуржу билан учрашуви бўлиб ўтди.

Марказий сайлов комиссияси раиси З.Низамходжаев меҳмонларни мамлакатимиз миллий сайлов тизимида амалга оширилаётган ислоҳотлар билан таништириб, сайлов Ўзбекистон Республикаси Конституцияси ҳамда Сайлов кодексига мувофиқ очиқ ва ошкора ўтказилаётганини таъкидлади.

Қайд этилганидек, хорижда яшаётган сайловчиларимизнинг ҳам сайлов ҳуқуқларини таъминлашга алоҳида эътибор қаратилмоқда. Шу мақсадда, Ўзбекистон Республикаси Президенти сайлови учун элчихоналар ва консуллик идоралари ҳузурида 37 та давлатда 54 та сайлов участкаси ташкил этилди. Шу жумладан,  Ўзбекистон Республикасининг Анқара шаҳридаги Элчихонасида 43-тартиб рақамли сайлов участкаси ва Истанбул шаҳридаги Бош консулхонасида 44-тартиб рақамли сайлов участкаси жойлашган.

Шу билан бирга, жорий сайловлар коронавирус пандемияси даврида ўтказилаётганини ҳисобга олиб, карантин қоидаларига риоя қилиш талабларидан келиб чиқиб сайлов комиссиялари аъзолари, кузатувчилар, сайловчилар орасида касаллик тарқалишини олдини олиш бўйича махсус йўриқнома ишлаб чиқилди. Барча сайлов участкаларида, яширин овоз бериш хоналарида, сайлов жараёнининг барча иштирокчилари тиббий ҳимоя воситаларидан фойдаланишлари шартлиги белгиланди.

Туркия Олий сайлов кенгаши раиси  Мухаррем Аккая Ўзбекистонда миллий сайлов қонунчилиги ва амалиётини такомиллаштириш борасида амалга оширилаётган изчил ислоҳотларга юқори баҳо берди, шунингдек Марказий сайлов комиссиясига сайловларни ўтказишда муваффақиятлар тилади.

Марказий сайлов комиссияси

Матбуот хизмати