Мажлисни Марказий Сайлов комиссияси раиси З.Низамходжаев очиб берар экан, у ўз сўзида мамлакатимиз Конституцияси ва Сайлов кодексига, шу йил феврал ойида киритилган ўзгартишларга биноан, илк бор октябрь ойида ўтказилган сайловда, конституциявий нормалар ва халқаро сайлов стандартларига мувофиқ, Ўзбекистон Республикаси Президенти даврийлик принципи асосида сайланганлигини қайд этиб ўтди.

Таъкидланганидек, сайлов жараёнида дунёнинг элликка яқин давлатидан, ва йигирмага яқин халқаро ташкилотдан, қарийб минг нафар кузатувчи қатнашди.

Сиёсий партиялар ва маҳаллалардан 64 минг 450 нафар маҳаллий кузатувчилар иштирок этди.

Бу муҳим сиёсий жараённи, мамлакатимиз ва хорижий давлатлар оммавий ахборот воситалари, интернет нашрларининг 1 минг 672 нафар вакиллари кенг ва фаол ёритиб, сайловнинг очиқлиги ва ошкоралигини таъминлашга, катта ҳисса қўшди.

Сайловда рўйхатга олинган 20 миллиондан ортиқ сайловчидан 16 миллиондан зиёди, ёки 80,4 фоизи, ўз хоҳиш-иродасини эмин-эркин ифода этиб, овоз берди.

Сайлов якунлари бўйича, сайловчиларнинг 80,12 фоиз овози билан Тадбиркорлар ва ишбилармонлар ҳаракати – Ўзбекистон Либерал-демократик партиясидан номзод Шавкат Миромонович Мирзиёев Ўзбекистон Республикаси Президенти этиб сайланди.

Марказий сайлов комиссияси 2021 йил 29 октябрь куни бўлиб ўтган мажлисида, сайлов натижаларини кўриб чиқиб, Ўзбекистон Республикаси Президенти лавозимига ҳурматли Шавкат Миромонович Мирзиёев сайлангани тўғрисида қарор қабул қилди.

Маросим давомида Комиссия раиси Шавкат Миромонович Мирзиёевни Ўзбекистон Республикаси Президенти этиб сайлангани билан, барчани номидан самимий муборакбод этди.

Шундан сўнг, Президент Шавкат Миромоновичга Ўзбекистон Республикаси Президентининг гувоҳномаси топширилди.

Қайд этиш жоиз, Ўзбекистон Республикаси Конституциясининг 92-моддасига ва Ўзбекистон Республикаси Сайлов кодексининг 65-моддасига асосан, Ўзбекистон Республикаси Президенти Олий Мажлис палаталарининг қўшма йиғилишида Қасамёд қабул қилиши белгилаб қўйилган.

Шу муносабат билан, Ўзбекистон Республикасининг янгидан сайланган Президенти Шавкат Миромонович Мирзиёев қуйидагича қасамёд қабул қилди:

“Ўзбекистон халқига садоқат билан хизмат қилишга, республиканинг Конституцияси ва қонунларига қатъий риоя этишга, фуқароларнинг ҳуқуқлари ва эркинликларига кафолат беришга, Ўзбекистон Республикаси Президенти зиммасига юклатилган вазифаларни виждонан бажаришга тантанали қасамёд қиламан”.

Шавкат Мирзиёев:

“Асосий қомусимиз кафили сифатида Конституция ва қонунларимиз талабларини сўзсиз бажариш, “Инсон қадри учун” деган устувор тамойилни тўла рўёбга чиқариш, бундан буён ҳам фаолиятимнинг бош мезони бўлиб қолади.

Албатта, инсон қадри биз учун қандайдир мавҳум, баландпарвоз тушунча эмас. Инсон қадри деганда, биз, аввало, ҳар бир фуқаронинг тинч ва хавфсиз ҳаёт кечиришини, унинг фундаментал ҳуқуқ ва эркинликларини таъминлашни назарда тутамиз.

Инсон қадри деганда, биз ҳар бир фуқаро учун муносиб турмуш шароити ва замонавий инфратузилма ташкил этишни, малакали тиббий хизмат кўрсатиш, сифатли таълим, ижтимоий ҳимоя тизими, соғлом экологик муҳит яратиб беришни тушунамиз”.