Mamlakatimizda boʻlib oʻtishi kutilayotgan muddatidan ilgari Oʻzbekiston Respublikasi Prezidenti saylovi munosabati bilan joriy yilning 16-iyun kuni Markaziy saylov komissiyasida Mustaqil Davlatlar Hamdoʻstligi ijroiya qoʻmitasining saylovlarni kuzatish missiyasi vakillari bilan uchrashuv boʻlib oʻtdi.

Uchrashuvda saylov qonunchiligidagi yangiliklar, Prezident sayloviga tayyorgarlik koʻrish va uni oʻtkazish doirasida amalga oshirilayotgan ishlar toʻgʻrisida maʼlumot berildi. Saylov kampaniyasi tadbirlari Saylov kodeksi talablari va demokratik prinsiplarga muvofiq amalga oshirilayotgani taʼkidlandi.

Xususan, saylov komissiyalari aʼzolarining saylov qonunchiligi haqidagi nazariy bilimlari va amaliy tajribasini oshirish, saylov jarayoniga zamonaviy axborot kommunikatsion texnologiyalarni joriy etish, xotin-qizlarning saylovlardagi oʻrnini kuchaytirish, imkoniyati cheklangan fuqarolarning saylov huquqlarini taʼminlash borasida amalga oshirilgan ishlarga toʻxtalib oʻtildi.

Taʼkidlanganidek, MDH kuzatuvchilari faoliyatini muvofiqlashtirish uchun Toshkent shahrida missiyaning shtabi ish boshlaydi va kuzatuvlarni tashkil etish bilan bogʻliq barcha tadbirlarni oʻtkazadi. Missiya shtabi vazifalari saylov jarayoni borishi haqida materiallarni toʻplash, ularga ishlov berish va tahlil qilish, saylov qonunchiligini huquqiy ekspertizadan oʻtkazishdan iborat.

Missiya vakillari oʻz navbatida qayd etib oʻtganlaridek, 9-iyul kuni boʻlib oʻtadigan saylovga tayyorgarlik koʻrish va uni oʻtkazish jarayonini kuzatib borishda oʻz faoliyatini ochiq, oshkora va obyektiv olib boradi.

Markaziy saylov komissiyasi

Matbuot xizmati